你今日靜觀咗未？

日常靜觀練習

1. 早啲落車靜觀步行

   返工放工時，提早一兩個站落車，練習靜觀步行，喺安全嘅路面情況下，隨時隨地都練得。只要集中注意力，一步步慢慢行，留意身體同身邊每一個感覺。如果你經過公園，你可能會聽到雀仔聲、見到路人、聞到泥土味、腳踏到樹葉、感覺到太陽嘅熱力，仲有腳嘅每一個動作。發現走咗神，心裡面想住其他事，唔緊要，再一次返嚟此時此刻。

2. 咪睇韓劇專注食飯

   每一次食嘢，都係練習靜觀進食嘅好時機。食嘢嘅時候，睇吓食物嘅顏色，聞吓係咩味，用手或者食具去掂吓，跟著用咀唇去試吓，放入口，等牙齒、舌頭、口腔感受一吓，再慢慢吞落肚。只要專注，真正品嚐食物，每一餐頭幾啖進行靜觀進食，已經係好好嘅小練習！

3. 洗手mindful break

   抗疫令到人人好大壓力，不如用洗手嘅時間做mindful break! 全心全意，專注洗手。
   整濕雙手，感受一吓水嘅溫度同聲音。加皂液，慢慢搽滿雙手，逐隻手指。由1數到10，沖走皂液，留意手嘅感覺，水嘅聲音。抺手嘅時候，感受一吓紙巾嘅質感。